ការពិភាក្សា

មេរៀនទី ១០៖ រស់នៅជាវិជ្ជមានជាមួយនឹងមេរោគអេដស៍

ការពិភាក្សា៖ រស់នៅជាមួយមេរោគអេដស៍

មានមនុស្សជាច្រើនដែលមិនបានដឹងថាពួកគេបានឆ្លងមេរោគអេដស៍ឬក៏អត់នោះទេ។ យើងគួរតែលើកទឹកចិត្តពួកគាត់ ឱ្យមានភាពក្លាហានក្នុងការទៅពិនិត្យឈាម និងការពារខ្លួនគាត់ផ្ទាល់។ វាក៏ជាការសំខាន់ដែរ ក្នុងការគាំទ្រពួកគាត់ក្រោយការធ្វើតេស្ដឈាម។

ជំហានទី១៖ អានសាច់រឿងរបស់ ឌី និងរ៉ានី

ឌីបានរៀបការជាមួយរ៉ានីរយៈពេល៣ឆ្នាំមកហើយ។ឌីធ្លាប់បានរួមភេទ ជាមួយស្រ្តី៤នាក់ មុនគាត់ស្គាល់ និងរៀបការជាមួយរ៉ានី។ គាត់មិនដែលធ្លាប់ធ្វើតេស្តឈាមនោះទេ។ ពួកគេមានកូនប្រុសម្នាក់ អាយុបាន២ឆ្នាំ ហើយឈឺជាញឹកញាប់។ ថ្ងៃមួយកូនរបស់ពួកគេឈឺជាទម្ងន់ ពួកគេក៏បាននាំមកទៅមន្ទីរពេទ្យបង្អែក។

បន្ទាប់ពីសម្រាកនៅក្នុងពេទ្យរយៈពេល មួយសប្ដាហ៍មកកូននោះ មិនបានធូរស្រាលឡើយ។ លោកវេជ្ជបណ្ឌិតស្នើសុំធ្វើ តេស្តឈាម។ ជាលទ្ធផលបានបង្ហាញថា កូនប្រុសនោះមានផ្ទុកមេរោគអេដស៍។

ជំហានទី២៖ ចែកសិស្សជាក្រុម សម្រាប់ការពិភាក្សា នូវសំណួរខាងក្រោម៖

តើអ្នកមានដំបូន្មានអ្វីខ្លះសម្រាប់ឌី និងរ៉ានី?
តើពួកគេ គួរធ្វើអ្វីបន្ទាប់ពីបានដឹងលទ្ឋផលបែបនេះ?
តើអ្នកគួរធ្វើអ្វីខ្លះ ដើម្បីជៀសវាងបញ្ហាដូចឌី និងរ៉ានី?

ជំហានទី៣៖ ធ្វើការពិភាក្សាក្រុមធំ តើយើងបានសិក្សាអ្វីពីរឿងរ៉ាវនេះ?